හතළිස් තුන්දහසකට අධික පිරිසක් අවතැන්ව සිටින බව, ආපදා කළමනාකරණ මධ්‍යස්ථානය පවසයි. ප්‍රදේශයේ දිස්ත්‍රික් ලේකම් කාර්යාල ද පීඩාවට පත් ජනතාවට සහන කටයුතු සළසා ඇත.
අයහපත් කාලගුණයෙන් විපතට පත් ජනතාව මුදාගැනීම සඳහා නාවික හමුදාව මේ වනවිට එම ප්‍රදේශවල සහන සැලසීමේ කටයුතුවල යෙදී සිටී. ඩිංගි යාත්‍රා නවයක් සහ නාවික සහන කණ්ඩායම් 06ක් ඊයේ අදාළ ස්ථාන වෙත අනුයුක්ත කෙරිණ.
ඉරණමඩු, ශාමිකුලම්, ඔට්ටුසුඩාන් සහ වසන්තපුරම් යන ප්‍රදේශවල ගංවතුරින් අවතැන් වූ ජනතාව සඳහා සහන කටයුතු ද නාවික හමුදාව විසින් දියත් කර තිබේ. ගංවතුර හේතුවෙන් අවතැන්ව සිටි ගැබිණි කාන්තාවක් ආරක්‍ෂක ස්ථානයක් වෙත රැගෙන යාමට ද නාවික හමුදාව ක්‍රියා කළේය.
කිලිනොච්චිය, මුලතිව්, වව්නියාව ප්‍රදේශයේ පහත් බිම් රැසක් ද ජලයෙන් යටව පවතී. සියලුම වැව් පිටාර ගලමින් තිබේ. ප්‍රදේශයේ පීඩාවට පත් ජනතාව මුදාගැනීමේ මෙහෙයුම් අඛණ්ඩව ක්‍රියාත්මකයි.
උතුරු පළාතේ විටින් විට වැසි හෝ ගිගුරුම් සහිත වැසි ඇති විය හැකි බව කාලගුණ විද්‍යා දෙපාර්තමේන්තුව නිවේදනය කරයි. ත්‍රිකුණාමලයේ සිට කන්කසන්තුරය සහ මන්නාරම හරහා පුත්තලම දක්වා වෙරළට ඔබ්බෙන් වන මුහුදු ප්‍රදේශවල වැසි හෝ ගිගුරුම් සහිත වැසි හටගනී.
ක්ෂණික කෙටි පණිවුඩ සේවාව සඳහා RuAlerts සමග එක්වන්න...
