පළමුව ලංකා ඛනිජ තෙල් සංස්ථා පරිශ්‍රයේදී වැඩ හිඳින බෝධීන් වහන්සේ අභියස අලුතින් තැන්පත් කළ බුද්ධ ප්‍රතිමා වහන්සේ සහිත ප්‍රතිසංස්කරණය කළ නව බෝධි ප්‍රාකාරය නිරාවරණය විය.
අනතුරුව නිවාස ලබා දීම සංකේතවත් කරමින් නිවාස ලාභීන් පස් දෙනෙකුට අග්‍රාමාත්‍යතුමා අතින් එම නිවාසවල යතුරු ප්‍රධානය කෙරිණි.
මෙහිදී දීඝවාපිය අරුණ අරමුදල සඳහා ලංකා ඛනිජ තෙල් නීතිගත සංස්ථාවේ වෘත්තිය සමිති නියෝජිතයන් විසින් රුපියල් දහතුන් ලක්ෂ හතළිස් පන්දහසක මුදලක් අග්‍රාමාත්‍යතුමාට භාර දෙන ලදී.
බලශක්ති අමාත්‍ය උදය ගම්මන්පිල මහතා මෙහිදී අග්‍රාමාත්‍ය මහින්ද රාජපක්ෂ මහතාට උපහාර තිලිණයක් ප්‍රධානය කළේය.
වසර 35කට වැඩි කාලයක් තිස්සේ කොළඹ වරායේ සිට නිමා සංකීර්ණය දක්වා දිවෙන කිලෝමීටර් හය හමාරක දුර ප්‍රමාණයක් තුළ පුද්ගලයන් අනවසරයෙන් පදිංචි සිට ඇත. එමගින් එම පුද්ගලයන් හා දේපල ආරක්ෂාවට මෙන්ම නල මාර්ගයේ ප්‍රතිසංස්කරණ කටයුතු වලට සිදුවන බලපෑම සැලකිල්ලට ගනිමින් මෙම නිවාස ලබාදීමට තීරණය කර ඇත.
ලංකා ඛනිජ තෙල් නීතිගත සංස්ථාව සහ ලංකා ඛනිජ තෙල් තොග ගබඩා පර්යන්ත සමාගම මැදිහත්වී රුපියල් මිලියන 500ක මුදලක් වැයකොට නව නිවාස ලබාදීම සිදු වේ. ඒ සඳහා නාගරික සංවර්ධන අධිකාරියට අයත් නිවාස 125ක් තෝරා ගෙන ඇත.
මෙම අවස්ථාවට බලශක්ති අමාත්‍ය උදය ගම්මන්පිල, ලංකා ඛනිජ තෙල් නීතිගත සංස්ථාවේ සභාපති සුමිත් විජේසිංහ, ලංකා ඛනිජ තෙල් තොග ගබඩා පර්යන්ත සමාගමේ සභාපති මොහොමඩ් උවයිස් මොහොමඩ්, ලංකා ඛනිජ තෙල් නීතිගත සංස්ථා වෘත්තිය සමිති සාමාජිකයන් ඇතුළු සේවකයන් පිරිසක් එක්ව සිටියහ.
