අගවිනිසුරු නලින් පෙරේරා, සිසිර ද ආබෘ යන විනිසුරුන්ගේ එකඟත්වය ඇතිව ශ්‍රේෂ්ඨාධිකරණ විනිසුරු ප්‍රසන්න ජයවර්ධන මහතා විසින් මෙම නඩු තීන්දුව ප්‍රකාශයට පත් කර තිබේ.
වත්මන් ශ්‍රේෂ්ඨාධිකරණ විනිසුරු විජිත් මළල්ගොඩ මහතා අභියාචනාධිකරණයේ සභාපතිවරයා වශයෙන් කටයුතු කළ අවධියේ නීතිඥ නාගහනන්ද කොඩිතුවක්කු මහතාට එරෙහිව පැමිණිල්ලක් ඉදිරිපත් කර ඇත. ඒ අනුව පැවති නඩු විභාගයකින් අනතුරුව ශ්‍රේෂ්ඨාධිකරණ ත්‍රිපුද්ගල විනිසුරු මඩුල්ල මෙම තීන්දුව අද ප්‍රකාශයට පත්කර තිබේ.
2015 වසරේ මැයි මස 23 දා එවකට අභියාචනාධිකරණ සභාපති විනිසුරු වශයෙන් කටයුතු කළ විජිත් මළල්ගොඩ මහතා ඉදිරියේ පැවති රේගු නඩුවකදී ඒ මහතා අපහසුවට පත්වන අයුරින් නීතිඥවරයෙකුට නුසුදුසු ආකාරයේ ප්‍රකාශයක් සිදු කලේ යැයි චෝදනා කරමින් නාගහනන්ද කොඩිතුවක්කු මහතාට එරෙහිව මෙම පැමිණිල්ල ඉදිරිපත් කර ඇත.
එම චෝදනාවලට තමන් නිවැරදි කරු බව ඔහු සඳහන් කර තිබුනි.
එම ප්‍රකාශය තුළින් නීතිඥ නාගහනන්ද කොඩිතුවක්කු මහතා විසින් විජිත් මලල්ගොඩ විනිසුරුවරයා කෙරෙහි තමන්ගේ විශ්වාසයක් නොමැති බවත් එමනිසා නඩු විභාගයෙන් ඉවත් වන ලෙසත් දැනුම්දී තිබූ බව මෙම නඩුවට අදාළ සාක්ෂි විභාගයේ දී අනාවරණය වී ඇත.
තීන්දුව ප්‍රකාශයට පත්කරමින් විනිසුරු ප්‍රසන්න ජයවර්ධන මහතා කියා සිටියේ නීතිඥ නාගහනන්ද කොඩිතුවක්කු මහතා සිදුකළ මෙම ප්‍රකාශය ඉතා බරපතළ එකක් බවත් ඒ තුළින් අධිකරණ ක්‍රමය කෙරෙහි පවතින විශ්වාසය පළුදු වීමට හේතුවන බවත් ප්‍රකාශ කර ඇත.
නීතිඥ කොඩිතුවක්කු විසින් විනිසුරු විජිත් මලල්ගොඩ මහතා වෙත එල්ල කළ චෝදනාව පදනම් විරහිත අසත්‍ය චෝදනාවක් බව පෙන්වාදුන් ශ්‍රේෂ්ඨාධිකරණ විනිසුරු ජයවර්ධන මහතා ඒ තුළින් ඔහු නීතිඥවරුන්ගේ ආචාරධර්ම සංග්‍රහයේ 60 සහ 61 වන වගන්ති උල්ලංඝනය කර ඇති බව ද පවසා ඇත.
එහෙත් ඉකුත් 13 වනදා මෙම පැමිණිල්ල විභාගයට ගත් අවස්ථාවේදී තමන් විසින් විනිසුරු විජිත් මළල්ගොඩ මහතා වෙත එල්ල කළ චෝදනා කොන්දේසි විරහිතව ඉල්ලා අස්කර ගන්නා බවත් ඒ පිළිබඳව කණගාටුව පළ කරන බවත් නාගහනන්ද කොඩිතුවක්කු නීතිඥවරයා විසින් ප්‍රකාශ කර තිබුණත් ඔහු විසින් කර ඇති ප්‍රකාශය බරපතළ භාවය සැලකිල්ලට ගෙන මෙම තීන්දුව ලබාදීමට ශ්‍රේෂ්ඨාධිකරණයට සිදුව ඇති බවද විනිසුරු ජයවර්ධන මහතා පවසා තිබේ.
ඒ අනුව අධිකරණ සංවිධාන පනතේ 42(2) වගන්තිය යටතේ නීතිඥ නාගහනන්ද කොඩිතුවක්කු මහතා උල්ලංඝනය කර ඇති බවත් ඒ අනුව අදාළ චෝදනාවට ඔහු වරදකරු කර ඔහුගේ නීතිඥ භාවය වසර තුනකට තහනම් කරමින් නියෝගයක් නිකුත් කරන බව ද ප්‍රසන්න ජයවර්ධන මහතා සිය නඩු තීන්දුවෙන් පවසා ඇත.
