දිස්ත්‍රික් ඩිජිටල් සංවර්තන කමිටු මේ වන විට දිවයිනේ දිස්ත්‍රික්ක 21කස්ථාපිත කර අවසන් අතර දිස්ත්‍රික්කයේ ඩිජිටල් සංවර්තනය සම්බන්ධයෙන් බලපාන ගැටලු හඳුනා ගෙන ඒසඳහා උපාය මාර්ගක්‍රියාත්මක කිරීම මෙම කමිටුව මඟින් සිදුකෙරේ. කෑගල්ල දිස්ත්‍රික් ඩිජිටල් සංවර්තන කමිටුව සඳහා මෙම ප්‍රථම ක්‍රියාකාරී සැලැස්ම සැකසීම තාක්ෂණ රාජ්‍ය අමාත්‍ය කනක හේරත් මහතාගේ ප්‍රධානත්වයෙන් කෑගල්ල දිස්ත්‍රික් ලේකම් කාර්යාල ශ්‍රවණාගාරයේදී සිදු කළා.
දිස්ත්‍රික් ලේකම්වරයා සහ ප්‍රාදේශීය ලේකම්වරුන් සමඟ සාමාජිකයින් තිස් දෙනෙකුගෙන් මෙම ක්‍රියාකාරී කමිටුව සමන්විත වන අතර උසස් අධ්‍යාපන ආයතන,වෘත්තීය පුහුණු ආයතන, ආයෝජන ප්‍රවර්ධන මණ්ඩලය, අපනයන සංවර්ධන මණ්ඩලය, ජාතික තරුණ සේවා සභාව ඇතුළු ආයතනවල නියෝජිතයන් මෙන්ම තොරතුරු තාක්ෂණ ක්ෂේත්‍රයේ ප්‍රවීණයන් හා නිදහස්තොරතුරු තාක්ෂණවේදීන් ඒ අතර වෙයි.ඔවුන්ගේ අදහස්,යෝජනා ඒකරාශී කර ගනිමින් මෙම ක්‍රියාකාරී සැලැස්ම සකස් කර තිබෙනවා.
රාජ්‍ය පරිපාලන, ස්වදේශ කටයුතු, පළාත් සභා සහ පළාත් පාලන අමාත්‍යංශය, තාක්ෂණ අමාත්‍යංශය සහ ශ්‍රී ලංකා තොරතුරු හා සන්නිවේදන තාක්ෂණ නියෝජිතායතනය (ICTA) මෙම ක්‍රියාකාරී සැලැස්ම සකස් කිරීමට දායකත්වය ලබා දී තිබේ. විශේෂයෙන් ම ශ්‍රී ලංකාවට ඩිජිටල් ආර්ථිකයක ප්‍රතිලාභ අත් කර ගැනීම සඳහා දිස්ත්‍රික්කය තුළ පදනම සකස් කිරීමට ඉවහල් වන කරුණු ද මෙම ක්‍රියාකාරී සැලැස්මට එක් කර ඇත.
මෙම ක්‍රියාකාරී සැලැස්ම එළිදැක්වීමේ අවස්ථාව ඇමතූ තාක්ෂණ රාජ්‍යඅමාත්‍ය කනක හේරත් මහතා එහිදී මෙසේ පැවසීය. “ඩිජිටල්කරණය හරහා රාජ්‍ය සේවාව බල ගැන්වීමටත් ශක්තිමත් කිරීමටත් හැකියි.ඒ සඳහා පියවර රැසක් ගෙන තිබෙනවා. දැනට තිබෙන ජාතික හැඳුනුම්පත වෙනුවට ඩිජිටල් හැදුනුම්පතක් ලබාදීමේ මූලික කටයුතු මේ වනවිට ආරම්භ කර තිබෙනවා.ඉන්දීය රජය ඒ සඳහා මුදල් ආධාර ලබාදී තිබෙනවා.
රාජ්‍ය සේවාවන් සඳහා මුදල් ගෙවීම් ඉ-ගෙවීම් වශයෙන් පමණක් සිදු කිරීමට පියවර ගන්නා ලෙස ජනාධිපතිතුමා දැනුම් දී තිබෙනවා. ඒ සඳහා නියමු ව්‍යාපෘතියක් ඉතා නුදුරේදීම ආරම්භ කරනවා. අද අපට තිබෙන තවත් අභියෝගයක් තමයි තොරතුරු තාක්ෂණ ක්ෂේත්‍රයට අදාළ ශ්‍රමිකයින් හිඟවීම. දත්ත තමයි අද වටිනාම සම්පත. ඒවා රැක ගැනීමත් අභියෝගයක්. සයිබර් ආරක්ෂක පනත ගේන්නේ මෙවැනි අභියෝග ජය ගැනීමටයි. ”
ශ්‍රී ලංකා තොරතුරු හා සන්නිවේදන තාක්ෂණ නියෝජිතායතනයේ ප්‍රධාන විධායක නිලධාරී මහේෂ් පෙරේරා මහතා එහිදී මෙසේ පැවසීය.“ජනතාව ශක්තිමත් කරමින් රටේ තිරසර සංවර්ධනය ඇති කිරීමේ අරමුණෙන් තමයි ජනාධිපතිතුමා ඩිජිටල් ශ්‍රී ලංකා 2030 රට හමුවට ගෙනැවිත් තිබෙන්නේ.ඒ අරමුණ සාර්ථක කර ගැනීමට නම් කාරණා කිහිපයක් ඉෂ්ට කර ගත යුතු වෙනවා.ඒ තමයි පැහැදිලි වැඩපිළිවෙළක් වගේම එහි ප්‍රතිලාභ දිවයින පුරා ගෙන යන යාන්ත්‍රණයක් සකස් කිරීම. දිස්ත්‍රික් ඩිජිටල් සුදානම් දර්ශකයත් ඊට පහසුවක් වේවි.ඒ වගේ ම නිවැරදි කළමනාකරණයකුත් තිබිය යුතුයි. මෙම කමිටුව හරහා මේ වැඩපිළිවෙළඅපට සාර්ථක කර ගන්න පුඵවන්. අද වන විට ජනතාව සවිබල ගන්වන්න රාජ්‍ය යාන්ත්‍රණය ශක්තිමත් කරන්න තොරතුරු තාක්ෂණය යොදා ගනිමින් සිටිනවා. ඒකට එක උදාහරණයක් තමයි ඉන්දියාව.ඔවුන් ජනතා කේන්ද්‍රීය මාර්ගගත සේවාවන් 3400ක් පමණ ලබා දෙනවා. බංගලාදේශයේ එම ගණන 1900කට ආසන්න වෙනවා. අපේ රටෙත් සේවාවන් රැසක් එසේ ලබා දෙනවා. නමුත් එම සේවාවන් තවදුරටත් නව්‍යකරණය කළ යුතු වෙනවා. ”
ශ්‍රී ලංකා තොරතුරු හා සන්නිවේදන තාක්ෂණ නියෝජිතායතනයේ නියෝජ්‍ය ප්‍රධාන ඩිජිටල් ආර්ථික නිලධාරී සමීර ජයවර්ධන මහතා මෙම අවස්ථාවට එක් වෙමින් මෙසේ පැවසීය.“ඩිජිටල් ආර්ථික ක්‍රියාවලිය ප්‍රායෝගික ව රටේ සියලු ස්තර වෙත ගෙනයෑම ඉතා වැදගත් වෙනවා. ඒ සඳහා මෙම දිස්ත්‍රික් ඩිජිටල් සංවර්තන කමිටු ශක්තිමත් යාන්ත්‍රණයක් වශයෙන් යොදා ගත හැකි වෙනවා. මේ හරහා පෞද්ගලික අංශයේ මෙන් ම තොරතුරු තාක්ෂණ කර්මාන්තයේ ප්‍රගමනයටත් හේතුවක් වේවි. ”
මේ වන විට සකස් කර තිබෙන දිස්ත්‍රික් ඩිජිටල් සුදානම් දර්ශකය (District Digital Readiness Index) මඟින් ශ්‍රී ලංකාවේ සියලු දිස්ත්‍රික්කයන්හි ඩිජිටල් ආර්ථිකයට හා ඩිජිටල් සංවර්තනයට අදාළ නිර්ණායකයන් පදනම් කර ගෙන සැසඳීමක් සිදු කරන අතර එමඟින් දිස්ත්‍රික්ක අතර ඇති විෂමතාවන් සියල්ල ග්‍රහණය කරනු ඇත.
තාක්ෂණ අමාත්‍යංශයේ අතිරේක ලේකම් ඒ.කේ.ආර්.අලවත්ත, රාජ්‍ය පරිපාලන, ස්වදේශ කටයුතු, පළාත් සභා සහ පළාත් පාලන අමාත්‍යංශයේ සහකාර ලේකම් අමිල පරාක්‍රම, ශ්‍රී ලංකා තොරතුරු හා සන්නිවේදන තාක්ෂණ නියෝජිතායතනයේ ජ්‍යෙෂ්ඨ කළමනාකරු මනෝජ් හේමරත්න යන මහත්වරු ඇතුළු පිරිසක් මෙම අවස්ථාවට සහභාගි විය.
