ඒ අනුව අදාළ ආරවුල සමථයට පත් කෙරුණු අතර පෙත්සම්කාර මාධ්‍යවේදියාට එරෙහිව මහේස්ත්‍රාත් අධිකරණය හමුවේ ගොනුකර තිබූ නඩුව ඉල්ලා අස්කර ගන්නා බවත් පෙත්සම්කරුට ඉදිරියේදී කිසිදු ක්‍රියා මාර්ගයක් නොගන්නා බවත් වග උත්තරකාර පොලිස් නිලධාරීන් විසින් අධිකරණය හමුවේ එකඟතාවය පළ කළා.
මාධ්‍යවේදී සරත් විමලරත්න මහතා විසින් ගොනු කර තිබූ මූලික අයිතිවාසිකම් පෙත්සමක් මුර්දු ප්‍රනාන්දු සහ මහින්ද සමයවර්ධන යන මහත්වරුන්ගෙන් සමන්විත විනිසුරු මඩුල්ලක් ඉදිරියේ කැඳවනු ලැබුවා.
එහිදී වග උත්තරකරුවන් වෙනුවෙන් පෙනී සිටි නියෝජ්‍ය සොලිසිටර් ජෙනරාල් මාධව තෙන්නකෝන් මහතා අධිකරණය හමුවේ කරුණු දක්වමින් වගඋත්තරකරුවන් පෙත්සම්කරුගෙන් සමාව අයැද සිටීමට සූදානම් බවත් ඔහුට එරෙහිව ඉදිරි නීතිමය ක්‍රියා මාර්ග නොගන්නා බවට එකඟවන බවත් දැනුම් දුන්නා.
ඒ අනුව අදාළ පෙත්සමේ වග උත්තරකරුවන් වශයෙන් නම්කර සිටි රත්නපුර හිටපු දිසාපති මාලනී ලොකු පෝතාගම, එම කාර්යාලයේ ආරච්චි අනුරාධ බණ්ඩාර, රත්නපුර එවක පොලිස් ස්ථානාධිපතිවරයා, එහි එවක කොස්තාපල් සමීර, කුරුවිට හමුදා කඳවුරේ එවක කෝප්‍රල් සේනානායක යන අය අධිකරණයේ පෙනී සිටි අතර පසුව ඔවුන් විවෘත අධිකරණයේදී පෙත්සම්කාර මාධ්‍යවේදියාගෙන් වැඳ සමාව ගත්තා.
2019 වසරේ මැයි මස 29 වැනිදා රත්නපුර දිසාපති කාර්යාලයෙන් ලැබුණු දැනුම් දීමකට අනුව තමා හිස් වැසුමක් පැළඳ එම කාර්යාලයට ගිය බවත් එම අවස්ථාවේදී එහි සිටි පොලිසියේ හා යුද හමුදාවේ නිලධාරී ඊට විරෝධය පළ කළ බව පෙත්සම්කාර මාධ්‍යවේදියා සදහන් කළා.
පසුව හිස් වැසුම ගලවා තමන් කාර්යාලට ඇතුළු වූවත් ඇතිවූ බහින්බස් වීමක් දුර දිග යාමෙන් එහි සිටි පොලිස් නිලධාරීන් සහ හමුදා නිලධාරියකු තමන්ට පහර දුන් බවත් පෙත්සමින් සඳහන් කර තිබුණා.
එහිදී වගඋත්තරකාර දිසාපතිවරිය තමන්ට අමානුෂික ආකාරයෙන් බැණ වැදුණු බවත් පෙත්සම්කාර මාධ්‍යවේදියා සඳහන් කර තිබුණා.
පසුව ඔවුන් තමන්ව අත්අඩංගුවට ගෙන රත්නපුර පොලිසියට රැගෙන ගොස් එදින සවස තෙක් පොලිස් ස්ථානයේ රඳවා තබා නිදහස් කළ බවත් පෙත්සම්කරු සඳහන් කළා.
මේ තුළින් වග උත්තරකරුවන් සිය මූලික මිනිස් අයිතිවාසිකම් උල්ලංඝනය කර ඇති බවට තීන්දුවක් ලබාදෙන ලෙසත් ඉල්ලා පෙත්සම්කරු විසින් ශ්‍රේෂ්ඨාධිකරණය හමුවේ මෙම පෙත්සම ඉදිරිපත් කර තිබුණා.
