ආලංකුලම ග්‍රාමයේ පදිංචි ඩි. එම්. කපුරු මැණිකා (64) මහත්මිය කළ ඉල්ලීමට ප්‍රථිචාර ලෙස සෙබල එස්. එන්. එම්. චමින්ද බණ්ඩාර මහතා හා ඔහුගේ බිරිද වන එන්.කේ.ඒ නිරෝෂා උමයන්ගනී මහත්මිය මෙම සත්කාරය සිදු කර ඇත.

එස්. එන්. එම්. චමින්ද බණ්ඩාර මහතා ගජබා රෙජිමේන්තුව 14 බළ ඇණියේ සේවය කරමින් සිටියදී වැළිඔය ආන්දම්කුලම ප්‍රදේශයේදී 2008 වර්ෂයේ 07 මාසයේ 17 වන දින තම දකුණු පාදය අහිමි වී ඇත. ඔහුගේ බිරිද වන එන්.කේ.ඒ නිරෝෂා උමයන්ගනී මහත්මිය ආණමඩුව ප්‍රාදේශීය සභාවේ මන්ත්‍රීවරියකි.

කඩා වැටීමට ආසන්නව තිබූ කපුරු මැණිකේ මහත්මියගේ පැල්පත විටක වන අලි තර්ජනයටත් , අධික වර්ෂා සමයේ ජල ගැලීම්වලින් හානී නිරන්තරවම ලක්ව තිබිණ.

දියණියන් 04 දෙනෙකුගේ පියකු වන චමින්ද බණ්ඩාර මහතා සිය දරුවන් හා ප්‍රදේශවාසීන්ගේ සහය ඇතිව තම දැතීන් අත්තිවාරමේ සිට වහලය දක්වා සියළු කටයුතු ඉකුත් මාස තුනක කාලය තුලදී සිදු කිරීම මෙහි ඇති විශේෂත්වයකි. මේ සදහා චමින්ද මහතාට විවිධ අයගේ මුදල් උපකාර ලැබී තිබේ.

නිම කළ නිවස ඩි.එම්. කපුරු මැණිකා මහත්මියට 21 දා දහවල් භාර දෙන ලදී.