අගවිනිසුරු ජයන්ත ජයසූරිය, බුවනෙක අලුවිහාරේ, සිසිර ද ආබෘ, ප්‍රියන්ත ජයවර්ධන සහ විජිත් මළල්ගොඩ යන මහත්වරුන් ගෙන් සමන්විත විනිසුරු මඩුල්ල හමුවේ පෙත්සම් කැදවනු ලැබුවා.
එහිදී මැතිවරණ දිනය අභියෝගයට ලක්කරමින් ගොනුකර තිබූ පෙත්සම් වල වග උත්තරකරුවකු ලෙස නම් කර සිටින ජනාධිපති ලේකම් පී.බී.ජයසුන්දර මහතා වෙනුවෙන් ජනාධිපති නීතිඥ රොමේෂ් ද සිල්වා මහතා කරුණු ඉදිරිපත් කිරීම ආරම්භ කළේය.
ජනාධිපති නීතිඥ රොමේෂ් ද සිල්වා මහතා කරුණු දක්වමින් කියා සිටියේ මෙම පෙත්සම තුල කිසිදු නීතිමය පදනමක් නොමැති බවත් එබැවින් එය විභාගයට නොගෙන නිෂ්ප්‍රභ කළ යුතු බවයි.
කොරෝනා වසංගතය බව පවසමින් දිගින් දිගටම මැතිවරණය කල් දැමීමට මැතිවරණ කොමිසමට හැකියාවක් නොමැති බව පෙන්වා දුන් ජනාධිපති නීතිඥ රොමේෂ් ද සිල්වා මහතා කිසියම් සෞඛ්‍ය ආරක්ෂිත ක්‍රමවේදයක් සකස් කොට ඒ යටතේ මැතිවරණය පැවැත්වීමට මැතිවරණ කොමිසම උත්සුක විය යුතු බවට ද අවධාරණය කර සිටියේය.
ආණ්ඩුක්‍රම ව්‍යවස්ථාවට අනුව ජනාධිපතිවරයා විසින් පාර්ලිමේන්තුව විසුරුවා හැරීමෙන් පසුව එම පාර්ලිමේන්තුවේ නිල කාලය අවසන් වන බවත් එය විසුරුවා හැරීමෙන් පසුව මැතිවරණය පවත්වන දිනය වෙනස් වූ පමණින් එම විසුරුවා හැරීමේ නියෝගය බල ශූන්‍ය නොවන බවත් ජනාධිපති නීතිඥ රොමේෂ් ද සිල්වා මහතා සඳහන් කළේය.
ජනාධිපතිවරයා විසින් ඉකුත් මාර්තු මස 02 වැනිදා පාර්ලිමේන්තුව විසුරුවා හැරීම ආණ්ඩුක්‍රම ව්‍යවස්ථාවේ 32(2) වගන්තිය යටතේ සිදුකර ඇති බව පෙන්වා දුන් ජනාධිපති නීතිඥ රොමේෂ් ද සිල්වා මහතා එය ව්‍යවස්ථාවට අනුකූලව සිදු කර ඇති බවත් එය අභියෝගයට ලක් කළ නොහැකි බවත් අවධාරණය කර සිටියේය.
පෙත්සම සලකා බැලීම තවදුරටත් සිදුවෙමින් පවතියි.
ජනාධිපති නීතිඥ රොමේෂ් ද සිල්වා මහතාගේ දේශනය අවසන් වීමෙන් පසුව නීතිපතිවරයා වෙනුවෙන් පෙනී සිටින අතිරේක සොලිස්ටර් ජෙනරාල් ඉන්දිකා දේවමුණි ද සිල්වා මහත්මියගේ දේශන ද ඉදිරිපත් කිරීමට නියමිතව තිබේ.
