යුක්රේනයේ කිවී (kiev) නුවර සිට යුක්රේන සංචාරකයින් 186 දෙනෙක් මෙලෙස මත්තල ගුවන්තොටුපලින් ශ්‍රී ලංකාවට ළගාවිය. ඔවුන් අතර යුක්රේන ජාතික ළදරුවන් 20ක් පමණ සිටීම ද විශේෂත්වයක්.
දිවයිනට පැමිණි පලමු සංචාරක කණ්ඩායම පිළිගැනීම සඳහා සංචාරක ඇමති ප්‍රසන්න රණතුංග, ගුවන්තොටුපල රාජ්‍ය ඇමති ඩී.වී.චානක, ගුවන්තොටුපල සහ ගුවන් සමාගමේ සභාපති විශ්‍රාමික මේජර් ජී.ඒ.චන්ද්‍රසිරි ඇතුළු පිරිසක් එක්ව සිටියහ.
මත්තල ගුවන්තොටුපල පරිශ්‍රයේ ඔවුන් පිළිගැනීම සඳහා විශේෂ නර්ථනයක් සංවිධානය කර තිබුණේ ශ්‍රී ලංකා තේ මණ්ඩලය විසින්. පැමිණි සියලුම සංචාරකයින්ට තේ මණ්ඩලය විසින් දේශීය තේ ඇතුලත් ත්‍යාග පාර්සලයක් ද ලබාදුන්නේය.
'කොවිඩ් 19' වසංගතය හේතුවෙන් මෙරට ගුවන්තොටුපල වසා දැමුනේ පසුගිය මාර්තු 19 වැනිදායි. ඒ අනුව පසුගිය මාස 09ක කාලය පුරා මෙරටට කිසිදු සංචාරකයෙක් නොපැමිණි අතර ගුවන්තොටුපල මෙහෙයුම් ක්‍රියාත්මක වූයේ විදෙස්ගත ශ්‍රමිකයන් රැගත් විශේෂ ගුවන්යානා සඳහාත්, ගුවන් භාණ්ඩ ප්‍රවාහනය හා මගී හුවමාරු කටයුතු සඳහාත් පමණි.
සිය ජීවනෝපාය අහිමිවීම හේතුවෙන් මෙරට සංචාරක ව්‍යාපාරයේ සෘජු හා වක්‍ර යැපුනු ලක්ෂ 30කට ආසන්න පිරිසක් පීඩාවට පත්විය.
මේ තත්වය සැලකිල්ලට ගත් ජනාධිපති ගෝඨාභය රාජපක්ෂ, අගමැති මහින්ද රාජපක්ෂ, ආර්ථික පුනර්ජීවන කමිටු සභාපති බැසිල් රාජපක්ෂ, සංචාරක ඇමති ප්‍රසන්න රණතුංග යන මහත්වරුන්ගේ විශේෂ මැදිහත් වීම මත සෞඛ්‍ය මාර්ගෝපදේශ අනූව ගුවන්තොටුපල හා රට සංචාරකයන්ට විවෘත කිරීමට සැලසුම් කෙරිණ.
සංචාරකයින් මෙරට ගෙන්වීම සඳහා සංචාරක සංවිධාන ආයතන 03ක් ඉදිරිපත්ව තිබුණි.
ඒ අනූව අගමැති මහින්ද රාජපක්ෂ හා සංචාරක ඇමති ප්‍රසන්න රණතුංග යන මහත්වරුන් රුසියානු සමූහාණ්ඩුවට අයත් රටවල සංචාරකයන් මෙරටට ගෙන්වා ගැනීම සඳහා ඒකාබද්ධ කැබිනට් පත්‍රිකාවක් ද ඉදිරිපත් කලහ.
ඒ සඳහා අනුමැතිය ලබාදෙමින් කැබිනට් මණ්ඩලය තීරණය කළේ සෞඛ්‍ය මාර්ගෝපදේශ අනූව එය සිදු කිරීමටයි.
එහෙත් 'කොවිඩ් 19' දෙවන රැල්ල හේතුවෙන් එය තරමක් ප්‍රමාද විය. එහෙත් සංචාරක ඇමතිවරයා දිගින් දිගටම රජයට කරුණු ඉදිරිපත් කිරීමේ ප්‍රතිඵලයක් ලෙස නියමු ව්‍යාපෘතියක් ලෙස ගුවන්තොටුපල හා සංචාරකයන්ට රට විවෘත කිරීමට තීරණය කෙරිණ.
ඊට අදාලව සංචාරකයන් මෙරටට පැමිණීම සඳහා වීසා අයදුම් කිරීමේ සිට මෙරටට පැමිණ ආපසු සිය රට බලා යාම දක්වා කාලය තුල අනුගමනය කල යුතු සෞඛ්‍ය මාර්ගෝපදේශ සංග්‍රහයක් සෞඛ්‍ය අංශ සකස් කර සංචාරක ඇමති ප්‍රසන්න රණතුංග මහතාට යොමු කල අතර ඇමතිවරයා එය ගුවන්තොටුපල හා සංචාරක සංවර්ධන අධිකාරියේ බලධාරීන්ට යොමු කෙරිණ.
ඊයේ (28) දිවයිනට පැමිණි යුක්රේන සංචාරක කණ්ඩායම පැය 72කට පෙර පී.සී.ආර්. පරීක්ෂාවට ලක් කෙරුනු අතර ඔවුන්ට අඳාල හෝටල්වල ලැඟුම් ගැනීමට පෙර තවත් පී.සී.ආර්. පරීක්ෂාවකට ලක් කෙරිණ.
ඉදිරි දින 07තුල ඔවුන්ට යළි පී.සී.ආර්.පරීක්ෂාවක් සිදු කිරීමට සැලසුම් කර තිබේ. ඔවුන් දින 10ක් මෙරට තුල රැඳී සිටීමට නියමිතයි. කොග්ගල ප්‍රදේශයේ වෙරලාශ්‍රිත ප්‍රදේශවල ඔවුන් ලැඟුම්ගන්නා අතර එම ප්‍රදේශවාසීන්ට සංචාරකයන් ගැවසෙන ප්‍රදේශවලට යාමට ඉඩ නොලැබේ.
පලමු සංචාරක කණ්ඩායම දිවයිනට පැමිණිමට පෙර මත්තල ගුවන්තොටුපල පරිශ්‍රයේ පැවැති මාධ්‍ය හමුවකට එක්වෙමින් සංචාරක ඇමති ප්‍රසන්න රණතුංග මහතා සඳහන් කලේ (28) සිට ජනවාරි 24 දින දක්වා මෙම සංචාරක නියමු ව්‍යාපෘතිය ක්‍රියාත්මක වන බවයි. රුසියානු සමූහාණ්ඩුවට අයත් රටවල් වලින් සංචාරකයන් 2580ක් මෙරටට පැමිණීමට නියමිත බවද ඔහු ප්‍රකාශ කළේය.
සංචාරක බුබුල (Travel Bubble) සංකල්පය යටතේ සෞඛ්‍ය මාර්ගෝපදේශ අනුව එය ක්‍රියාත්මකයි. හඳුනාගත් කලාපයක මෙම අයට නවාතැන් සැපයෙන බවත් ඔවුන් සහ ප්‍රදේශවාසීන් අතර කිසිඳු සම්බන්ධයක් ඇති නොවන පරිදි මෙය සැලසුම් කර ඇති බවත් ඇමතිවරයා ප්‍රකාශ කළේය.
මෙම නියාමන ව්‍යාපෘතියේ සාර්ථකත්වය පිළිබඳ විශ්ලේෂණය කර එහි අඩුපාඩු හඳුනාගෙන ඒවාද නිවැරදි කර ගනිමින් සෞඛ්‍ය මාර්ගෝපදේශ අනුව ලබන ජනවාරි මස අග දී ගුවන්තොටුපල නිල වශයෙන් යළි විවෘත කිරීමට අපේක්ෂා කරන බවද ඇමති ප්‍රසන්න රණතුංග මහතා මෙහිදී කියා සි‍ටියේය.
ඒ අනූව වාණිජ ගුවන් ගමන් ආරම්භ කිරීමට සූදානම් බවද ඔහු අවධාරණය කළේය.
“ සංචාරකයන්ට රට යළි විවෘත කිරීම නිසා විදෙස්ගත ශ්‍රමිකයන් ගෙන්වීමේ කටයුතු අඩාල වන්නේ නෑ. සංචාරකයන් ආවත් අපේ ප්‍රමුඛතාව මව්බිම ඒමට සිටින අපේ ජනතාවටයි. ඒ වගේම සංචාරකයන්ට රට නැවත විවෘත කිරීම සමඟ සංචාරක පොකුරු ඇතිවේවි යැයි කිසිවෙකු බිය විය යුතු නෑ.
අපි මේ නියාමන ව්‍යාපෘතිය තුල සංචාරකයන් හා අපේ රටේ ජනතාව සම්බන්ධ වීම උපරිමයෙන් අවම කර තිබෙනවා. සංචාරකයන්ට ගැවසිය හැක්කේ අදාල හෝටල්වල හා වෙරල තිරයේ පමණයි.
මේ කාලය තුල ඔවුන් සිටින ප්‍රදේශයට මෙරට වැසියන්ට යාමට නොහැකියි. සංචාරකයන් රටින් පිටව ගිය පසු අදාල හෝටල් සේවකයන් දින 14ක් එම හෝටල්වලම නිරෝධායනය කරනවා.
ඒ නිසා ඒ ගැන අනියත බියක් ඇති කරගත යුතු නෑ.” අමාත්‍ය ප්‍රසන්න රණතුංග මහතා වැඩිදුරටත් ප්‍රකාශ කළේය.
