රට තුළ නව තාක්ෂණ උද්‍යාන පහක් බිහි කිරීම එහි ප්‍රධානතම පියවරක් ලෙස හඳුනාගෙන තිබේ. මේ සඳහා දැනටමත් නගර හතරක්; ගාල්ල, මහනුවර, නුවරඑළිය සහ කුරුණෑගල හඳුනාගෙන ඇත.
තාක්‍ෂණික ව්‍යවසායකයින් විසින් මෙහෙයවනු ලබන ආර්ථිකයක් නිර්මාණය කිරීම තාක්ෂණ ක්‍ෂේත්‍රයෙන් අපනයන හා විදේශ ඉපැයීම් ඉහළ නැංවීමට සහ දැනුම හා වෘත්තීය සේවාවන් ජාතික ආර්ථිකයට විවර කිරීම මෙහි අරමුණයි. තාක්ෂණ ව්‍යවසායකයින් , වෘත්තීකයන් , සේවා සපයන්නන් හා අදාළ නිලධාරින් දැනුවත්කිරීම හා ඔවුන්ගේ අදහස් යෝජනා විමසීම සදහා පැවැති හමුවකදී මේ අදහස් පළ කෙරිණ. කොළඹ කොටුව මිලොදා මුල්‍ය අධ්‍යාපන ආයතන ශ්‍රවනාගාරයේ දී මෙම හමුව පැවැත්විණි.
මෙම වැඩසටහන මඟින්, තාක්ෂණය කේන්ද්‍ර කරගත් ආයෝජන, ව්‍යාපාර, ව්‍යවසායකත්වය සහ ඊට අනුබද්ධ සේවා කර්මාන්ත වෙත ප්‍රවේශවීමට දිරිමත් කෙරේ. එමගින් තරුණ තරුණියන්ට ඉහළ ආදායම් උත්පාදනය කරන කර ගත හැකි නව රැකියා අවස්ථා නිර්මාණය වනු ඇත. මෙසේ සැලසුම් කරන ලද තාක්ෂණ උද්‍යාන Techno parks සමාජ ආර්ථික හා භූගෝලීය ලක්ෂණ සැලකිල්ලට ගනිමින් ඒ ඒ පරිසරයන්ට අනුගත ව්‍යාපාර දිරිගන්වමින් රටේ අවශ්‍යතා සපුරාලීම සඳහා ක්‍රියාත්මක වනු ඇත.
ක්‍ෂණික උද්‍යානයක් යනු පෞද්ගලික අංශයේ තාක්ෂණ පාදක ව්‍යායාපරවලට අනුබලදෙන හා අවශ්‍ය බහුවිද පහසුකම් එකම ස්ථානයකදී සපයන්නකි. විවිධ ව්‍යාපාර රාජ්‍ය අංශය සමග සමීපව අන්තර් සබදතා පවත්වාගනිමින් ඒවායේ වර්ධනය සදහාවූ පර්යේෂණ මගින් පෝෂණය කරන ක්‍රමවේදයකි.
මෙම තාක්ෂණ උද්‍යාන තුළ නව ආයෝජකයන් සදහා ඉන්කියුබේටර් පහසුකම්, වැඩසටහන් සහ සහයෝගීතා ක්‍රියාකාරකම්, අඛණ්ඩ විදුලිබල සැපයුම, විදුලි සංදේශ මධ්‍යස්ථාන, පහසුකම් සැපයීම් අංශ හා ආරක්ෂාව, පරිපාලන කළමනාකරණ කාර්යාල, බැංකු කාර්යාල, සම්මන්ත්‍රණ මධ්‍යස්ථානය, වාහන නැවැත්වීම සහ අභ්‍යන්තර ප්‍රවාහනය වැනි යටිතල පහසුකම් වලින් යුක්තවේ.
එමෙන්ම ඒ ඒ ප්‍රදේශවල සවාභාවික පරිසරය සමීප හා බැඳී ඇති පරිසරයක් නිර්මාණය කිරීම කෙරෙහි අවධානය යොමු කෙරෙන අතර පරිසර හිතකාමී බව මුලිකම පදනමක් ලෙස සැලකේ. යෝජිත තාක්ෂණ උද්‍යාන තුල, කාර්යබහුල - ජීවිතවල සමතුලිතතාවයට අත්‍යවශ්‍ය විනෝදාත්මක දේ ඇතුළු නවීන පහසුකම්වලින්ද යුක්තවනු ඇත. මෙම තාක්ෂණ උද්‍යානයක් අක්කර සියයකින් පමණ සමන්විතවන අතර එහා ආශ්‍රිතව තවත් යටිතල පහසුකම් රැසක් සංවර්ධනය කෙරෙනු ඇත.
මෙවැනි නව තාක්ෂණ පාදක ආර්ථිකයක් ගොඩනැගීමේදී ඩිජිටල් සන්වර්තන උපාය මාර්ග ඊට ගැලපෙන නීතිරීති ඩිජිටල් යටිතල පහසුකම් ඇතුළු සියලු අවශ්‍යතා හදුනාගෙන ගොඩනගන ලද පැහැදිලි ප්‍රතිපත්තියක් තොරතුරු හා සන්නිවේදන තාක්ෂණ නියෝජිතායතනය සතු බවත් එය ක්‍රියාවට නැගීම මඟින් මෙම ක්‍රියාවලිය වඩාත් සක්තිමත්ව ඉදිරියට ගෙනයාහැකි බව තොරතුරු හා සන්නිවේදන තාක්ෂණ නියොජිතායතනයේ සභාපති මහාචාර්ය ලලිත් ගමගේ මහතා මෙහිදී ප්‍රකාශ කරන ලදී.
අන්‍යෝන්‍ය වශයෙන් වාසිදායක වන පරිදි ශ්‍රී ලංකාවේ සිය ව්‍යාපාර ආරම්භ කිරීමට විදේශීය සමාගම් දිරිමත් කිරීම මගින් මෙම තාක්ෂණ උයන් සෘජු විදේශ ආයෝජන ආකර්ෂණය කර ගැනීමට උපකාරී වනු ඇත. තාක්ෂණ උයන් ඩිජිටල් පරිවර්තනය හා නවෝත්පාදනය තුළින් කලාපීය සංවර්ධනයට සහාය වන පරිසරයක් ස්ථාපිත කෙරේ.
මෙම අවස්ථාවට තාක්ෂණ අමාත්‍යංශයේ අතිරේක ලේකම් ඒ. කේ .ආර් .අලවත්ත ,විදුලි සංදේශන නියාමන කොමිෂන් සභාවේ අධ්‍යක්‍ෂ ජනරාල් ඔෂද සේනානායක , තොරතුරු හා සන්නිවේදන තාක්ෂණ නියෝජිතායතනයේ ප්‍රධාන විධායක නිලධාරි මහින්ද බි හේරත් ප්‍රධාන ඩිජිටල් ආර්ථික නිලධාරි අනුර දි අල්විස් ඇතුළු පිරිසක් සහභාගිවුහ.
