ලංකා විදුලිබල මණ්ඩලය යටතේ පවතින මේ වනවිට වැඩ නිමවූ සහ නිමවෙමින් පවතින විදුලිබල ව්‍යාපෘතින්හි වර්තමාන ප්‍රගතිය අමාත්‍ය රවි කරුණානායක මහතාගේ අවධානයට යොමුව තිබේ.
ඊයේ (09) පෙරවරුවේ විදුලිබල, බලශක්ති සහ ව්‍යාපාර සංවර්ධන අමාත්‍යාංශ පරිශ්‍රයේ දී ලංවිම අතිරේක සාමාන්‍යාධිකාරිවරුන් හා සාමාන්‍යාධිකාරිවරුන්, ප්‍රධාන ඉංජිනේරුවන්, ව්‍යාපෘති අධ්‍යක්ෂවරුන්, ව්‍යාපෘති කළමනාකරුවන් ඇතුළු ලංකා විදුලිබල මණ්ඩලයේ ජ්‍යෙෂ්ඨ නිලධාරීන් විශාල පිරිසක් හමුවූ අමාත්‍යවරයාල මෙම ව්‍යාපෘති ප්‍රගතිය පිළිබදව කරුණු විමසනු ලැබීය.
මේ වනවිට ලංකා විදුලිබල මණ්ඩලය සහ විදුලිබල, බලශක්ති සහ ව්‍යාපාර සංවර්ධන අමාත්‍යාංශයේ අනුමැතිය ලබාදී වැඩ ආරම්භ කර ඇති විදුලි ව්‍යාපෘතීන්හි වර්තමාන තත්වය පිළිබදව ඊට අදාල නිලධාරීන් වෙතින් කරුණු විමසූ අමාත්‍යවරයා, මේ වනතෙක් වැඩ අවසන් කර ජාතික පද්ධතියට එක්කිරීමට නොහැකිවීමට බලපෑ හේතු පිළිබදය සවිස්තර වාර්ථාවක් කඩිනමින් තමා වෙත ලබාදීමට පියවර ගන්නා ලෙසද අදාළ නිලධාරින්ට උපදෙස් දෙන ලදී.
2015 වසරේ සිට මේ දක්වා පියසි මත සවිකල සූර්යබල පද්ධති හැරුණකොට, ජාතික විදුලිබල පද්ධතියට යම් ධාරිතාවයක් එක්කිරීමට සමත් කිසිදු විදුලි ව්‍යාපෘතියක් ස්ථාපිතකර නොමැති බවත්, මේ වනවිට ලංකා විදුලිබල මණ්ඩලය ලබන පාඩුව අවම කරගැනීමටනම්, විදුලිබල ක්ෂේත්‍රයේ දිශානතිය පුනර්ජනනීය බලශක්ති ක්ෂේත්‍රය කෙරෙහි යොමුකළ යුතුබවත්, එසේම මේ වනවිට ඉදිකිරීමට යෝජිත සියලු ව්‍යාපෘති හැකිතාක් කඩිනම් කළ යුතු බවත් අමාත්‍ය කරුණානායක මහතා අවධාරණය කළේය.
මෙම අවස්ථාවට විදුලිබල හා පුනර්ජනනීය බලශක්ති රාජ්‍ය අමාත්‍ය චම්පිකා ප්‍රේමදාස, අමාත්‍යාංශ ලේකම් ආචාර්ය බී.එම්.එස්. බටගොඩ, ලංවිම සාමාන්‍යාධිකාරි ඒ.කේ. සමරසිංහ යන මහත්වරුන් ඇතුළු අමාත්‍යාංශයේ සහ මණ්ඩලයේ ජ්‍යෙෂ්ඨ නිලධාරීන් විශාල පිරිසක් සහභාගි වූහ.
