ඊයේ පළමු දිනය සඳහා තරගය අවසන් කරන විට දකුණු අප්‍රිකා කණ්ඩායම සිය පළමු ඉනිමට කඩුලු 4ක් දැවී ලකුණු 316ක් ලබා සිටියා. තරගය පැවැත්වෙන්නේ, කේප් ටවුන්හි නිව් ලෑන්ඩ්ස් ක්‍රීඩාංගනයේදී. කාසියේ වාසිය දිනූ දකුණු අප්‍රිකා කණ්ඩායම පළමුවෙන් පන්දුවට පහරදීමට තීරණය කළා. ඉනිම ආරම්භ කළේ, රයන් රිකෙල්ටන් සහ එයිඩ්න් මැක්‍රම්. ආරම්භක කඩුල්ලේ සබඳතාව ලකුණු 61ක් වන විට මැක්‍රම් ලකුණු 17කට දැවී ගියා. දකුණු අප්‍රිකාව වෙනුවෙන් ඊයේ ශතක දෙකක් වාර්තාවීම විශේෂත්වයක්. නායක ටෙම්බා බවුමා ලකුණු 106යි. දක්ෂ පිතිහරඹයක නිරත රයන් රිකෙල්ටන් ඊයේ දිනය නිමා වන විට නොදැවී ලකුණු 176ක් ලබා සිටියා. ශ්‍රී ලංකා වේලාවෙන් අද පස්වරු දෙකට තරගය යළි ආරම්භ වීමට නියමිතයි.