අයුක්ති සහගත ලෙස සිය තානාපති මුක්තිය ඉවත් කිරීමට විදේශ අමාත්‍යාංශය ගත් තීරණය නීති විරෝධී යැයි ප්‍රකාශ කරන මෙන් ඉල්ලා අමෙරිකාවේ හිටපු ශ්‍රී ලංකා තානාපති ජාලිය වික්‍රමසූරිය මහතා විසින් මෙම අභියාචනා පෙත්සම ඉදිරිපත් කර ඇත.
මෙම පෙත්සම අද(12) අගවිනිසුරු ජයන්ත ජයසූරිය, විජිත් මළල්ගොඩ සහ මෘදු ප්‍රනාන්දු යන ත්‍රිපුද්ගල ශ්‍රේෂ්ඨාධිකරණ විනිසුරු මඩුල්ල හමුවේ කැඳවනු ලැබිණි.
එහිදී අගවිනිසුරු ජයන්ත ජයසූරිය මහතා සඳහන් කර සිටියේ පෞද්ගලික හේතුවක් මත මෙම නඩුවෙන් ඉවත්වන බවයි. ඒ අනුව අදාළ අභියාචනා පෙත්සම සලකා බැලීම ඔක්තෝබර් මස 11 වනදා තෙක් කල් තැබිණි.
ජාලිය වික්‍රමසූරිය මහතා කියා සිටින්නේ අමෙරිකා එක්සත් ජනපදයේ හිටපු තානාපතිවරයා ලෙස කටයුතු කළ තමන්ගේ තානාපති මුක්තිය විදේශ අමාත්‍යාංශය විසින් කිසිදු පරීක්ෂණයක් නොපවත්වා ඉවත් කිරීමට කටයුතු කළ බවයි.
එය නීති විරෝධී බවට තීන්දු කරන ලෙසත් විදේශ අමාත්‍යාංශයේ මෙම තීරණය බල රහිත කිරීමේ නියෝගයක් නිකුත් කර ලෙසත් ඉල්ලමින් තමා මුලින්ම අභියාචනාධිකරණය හමුවේ රිට් පෙත්සමක් ගොනු කළ ද එය විභාග නොගෙන ප්‍රතික්ෂේප කිරීමට අභියාචනාධිකරණය තීන්දු කළ බවද ජාලිය වික්‍රමසූරිය මහතා ශ්‍රේෂ්ඨාධිකරණය හමුවේ ගොනු කළ සිය පෙත්සමේ සඳහන් කර ඇත.
