එම සිලින්ඩරවල දැක්වෙන්නේ, අනුමත ප්‍රොපේන් 30%ක ප්‍රතිශතයක්, අදාළ ගෑස් සංයුතියට ඇතුළත් බවයි. ඉකුත් දිනවල වාර්තා වූ ගෘහස්ථ ගෑස් අනතුරුවලට හේතුව ගෑස් සංයුතියේ වෙනස්කම් බව, ඒ පිළිබඳ සොයා බැලීමට පත් කෙරුණු විශේෂඥ කමිටුව ඊයේ හෙළි කළා.
මේ අතර ශ්‍රී ලංකා ප්‍රමිති ආයතනය නව ගෑස් සංයුතියට අදාළ නව ප්‍රමිතිය ප්‍රකාශයට පත්කර තිබෙනවා. නව ප්‍රමිතියට අනුව ප්‍රොපේන් 30%ක් හා බියුටේන් 70%ක් අදාළ සංයුතියට ඇතුළත් වනවා. මීට අමතරව වාෂ්ප තත්වයේ පවතින ගෑස් අංශු මිලියනයක් තුළ ගන්ධය වහනය වන මාර්කැප්ටන් අංශු ඒකක 14ක් ද එම සංයුතියට ඇතුළත්.
නව සංයුතිය මුද්‍රණය කළ ගෑස් සිලින්ඩර දිවයිනේ බොහෝ ප්‍රදේශ වෙත අද මුදාහැර තිබුණා. එම සිලින්ඩරවල සඳහන්ව ඇත්තේ ප්‍රොපේන් 30%ක්, අදාළ ගෑස් සිලින්ඩරයේ ඇති සංයුතියට ඇතුලත් බවයි. කෙසේ වුවද නව සංයුතිය සටහන්කර ඇති නව ගෑස් සිලින්ඩර ප්‍රදේශ රැසක අලෙවි නියෝජිතයන් වෙත අද දිනය තුළත් ලැබී තිබුණේ නැහැ. ගෑස් ආශ්‍රිත අනතුරු ද අදත් ප්‍රදේශ කිහිපයකින් වාර්තා වී තිබුණා.
