අමාත්‍යවරයා මේ අදහස් පළකළේ, අද (28) පෙරවරුවේ විදුලිබල වෘත්තීය සමිති නියෝජිතයින් සමග පැවති සාකච්ඡාවකට එක්වෙමින්. මෙම හමුවට විදුලි වෘත්තීය සමිති 58 ක නියෝජිතයන් සහභාගි වූහ.
එම නියෝජිතයින් බහුතරයක් පෙන්වා දුන්නේ විදුලිබල මණ්ඩලය ඇතුළු ආයතන ගණනාවක් මූල්‍ය විනයකින් තොරව කටයුතු කරණ බවයි. අතිරික්ත සේවක පිරිසක් සිටියද විදුලි සේවා සැපයිමට පුද්ගලික ආයතන වෙත පැවරිමෙන් රජයට විශාල පාඩුවක් සිදුවන බව වෘත්තීය සමිති විසින් පෙන්වා දුනී. විදුලි වෘත්තීය සමිති සාමාජිකයින්ට පුද්ගලිකව දඩුවම් ලබාදීම පසුගිය වකවානුවේදී සිදුවු බවත්, ඒ වෙනුවෙන් චක්‍රලේඛ නිකුත්කර ඇති බවටත් ඔවුන් විසින් චෝදනා කරනු ලැබිණ.
මෙහිදී අදහස් දැක්වූ අමාත්‍යවරයා පැවසුවේ, විදුලිබල මණ්ඩලය තුළ පවතින මූල්‍ය හා සේවක විෂමතා මගහැරවීමට ඉදිරියේදී තමා අපේක්ෂා කරන බවත්, එම කටයුතු වලදී විදුලි වෘත්තීය සමිති සිය පෞද්ගලික අරමුණූ පසෙකින් තබා, එම කාර්යයට සහය ලබාදෙනු ඇති බවට විශ්වාස කරන බවත්ය. සියලු ක්‍රියාකාරකම්වල අවසානයේ විදුලිබල මණ්ඩලය ලාභ ලබන ආයතනයක් බවට පත්කිරීමත්, විදුලිබිල අඩුකර ලංවිම පාරිභෝගිකයාට සහන සලසන ආයතනයක් බවට පත්කිරීමත් ප්‍රධාන අරමුණ වියයුතු බව අමාත්‍යවරයා විසින් අවධාරණය කරන ලදී.
අමාත්‍යාංශ ශ්‍රවණාගාරයේ පැවති මෙම හමුවට විදුලිබල රාජ්‍ය අමාත්‍ය චම්පික ප්‍රේමදාස, අමාත්‍යාංශ ලේකම් ආචාර්ය බී.එම්.එස්. බටගොඩ, ලංකා විදුලි සේවක සංගමයේ ප්‍රධාන ලේකම් රංජන් ජයලාල්, විදුලිබල මණ්ඩලයේ ජාතික සේවක සංගමයේ සමුළු ලේකම් අජිත් දේවප්‍රිය ඇතුළු පිරිසක් එක්ව සිටියහ.
