දිවයිනේ ජනප්‍රිය පාසල් කීපයක ආදි සිසු සිසුවියන් විසින් අදාළ පෙත්සම් ඉදිරිපත් කර තිබුණා. මෙම පෙත්සම් අද අභියාචනාධිකරණයේ වැඩබලන සභාපතිනී දීපාලි විජේසුන්දර සහ අර්ජුන ඔබේසේකර යන විනිසුරු මඩුල්ල හමුවේ කැඳවනු ලැබීය.
එහිදී පෙත්සම්කාර පාර්ශවයේ නීතිඥවරු අධිකරණයට දන්වා සිටියේ රජයේ පාසල්වල පාසල් සංවර්ධන සමිතිවල විධායක කමිටු සඳහා ආදී ශිෂ්‍ය ශිෂ්‍යාවන් පත් වීම වළක්වාලමින් අධ්‍යාපන අමාත්‍යවරයා විසින් චක්‍රලේඛ නිකුත් කර ඇති බවයි.
අමාත්‍යවරයාගේ මෙම චක්‍රලේඛය චක්‍රලේඛය මුළුමනින්ම නීති විරෝධී බව පෙන්වාදෙන පෙත්සම්කරුවන් මේ හරහා ආදි සිසුන්ගෙන් පාසැල් වලට සිදුවූ සේවාව සම්පූර්ණයෙන්ම කප්පාදු කර ඇති බවට චෝදනා කළේය.
මේ හේතුවෙන් අදාළ චක්‍රලේඛය බලරහිත කිරීමේ නියෝගයක් නිකුත් කරන ලෙස පෙත්සම්කරුවන් අධිකරණයෙන් ඉල්ලා සිටියි.
ඒ අනුව, ලබන 28 වැනදා අධිකරණය හමුවේ කරුණු දක්වන්නැයි, අභියාචනාධිකරණය ඒ පෙත්සම්වල වගඋත්තරකරුවන් ලෙස නම් කර තිබු අධ්‍යාපන අමාත්‍යවරයා, එම අමාත්‍යාංශයේ ලේකම්වරයා, ජාතික පාසැල් අධ්‍යක්ෂ ඇතුළු පාර්ශව කීපයකට නොතීසි නිකුත් කර තිබේ.
