හදිසි අනතුරු සහ විකලාංග ඒකකයට අනුබද්ධව ක්‍රියාත්මක මෙම ත්‍රිමාණ මුද්‍රණාගාරය පිහිටා ඇත්තේ විකලාංග සායන පරිශ්‍රයේ යි.
ලෝක සෞඛ්‍ය සංවිධානය හදුන්වා දී ඇති උපකාරක තාක්ෂණවේදය අනුගමනය කරමින් එම වැඩපිළිවෙලට සහාය දැක්වීම සඳහා මෙම නව ඒකකය ස්ථාපනය කෙරිණි. අද විවෘත කෙරුණු ත්‍රිමාණ මුද්‍රණ යන්ත්‍රයේ පරිලෝකන කොටස හැරුණු විට අනෙක් සියලු කොටස් සහ එහි වැදගත්ම කොටස වන මෘදුකාංගය ද ශ්‍රී ලංකාවේම නිෂ්පාදනය වීම විශේෂත්වයක්. කෘත්‍රීම අත්පා සහ අනෙකුත් ශරීර කොටස් වලට අමතරව ඇතැම් වෛද්‍ය උපකරණ ද මෙම යන්ත්‍රය මගින් නිෂ්පාදනය කර ගැනීමේ හැකියාව ඇත.
1950 දශකයේ සිට ඊයේ වනතුරුම පැරිස් බදාම ආධාරයෙන් නිෂ්පාදිත අච්චුවකින් මෙම කෘත්‍රිම අවයව නිර්මාණය සිදු කෙරිණ. අද දින විවෘත කෙරුණු ත්‍රිමාණ මුද්‍රණාගාරය මගින් අදාළ රෝගීන්ට සුවිශාල සේවාවක් සැපයෙනු ඇති. රෝගීන් වෙත තම සිරුරට 100% ක්ම ගැළපෙන අවයවය මෙමගින් නිර්මාණය කර ගත හැකිය. මින් පෙර භාවිත කළ තාක්ෂණයට වඩා ඉතා උසස් තාක්ෂණ ක්‍රමවේදයක් මෙහිදී අනුගමනය කෙරේ. පැරිස් බදාම මගින් මෙම නිර්මාණය සිදු කරන්නේ නම් ගත වන කාලය සති 3 කට අධිකයි. නව ත්‍රිමාණ මුද්‍රණාගාරය මගින් සිදු කරන එක් නිර්මාණයක් පැය 4 ක වැනි කාලයකින් සම්පුර්ණ කර ගැනීමේ හැකියාව පවතී.
