යුද හමුදා සෙබළුන් ඝාතනය සම්බන්ධයෙන් ඉකුත් මහ මැතිවරණ සමයේ හිටපු නියෝජ්‍ය අමාත්‍ය විනයාගමූර්ති මුරලිදරන් හෙවත් කරුණා අම්මාන් සිදු කළ ප්‍රකාශයක් සම්බන්ධයෙන් පරීක්ෂණයක් සිදුකරන ලෙස පොලිස්පතිවරයා වෙත නියෝගයක් නිකුත් කරන්නැයි ඉල්ලා එම මූලික අයිතිවාසිකම් පෙත්සම ගොනු කර ඇත.
කඩුවෙල හිටපු නාගරික මන්ත්‍රීවරයෙකු වන බෝසෙත් කලෙහෙ පතිරණ මහතා විසින් පෙත්සම ඉදිරිපත් කර තිබිණ.
පෙත්සම අද එල්.ටී.බී. දෙහිදෙනිය, මුර්දු ප්‍රනාන්දු සහ අචල වෙංගප්පූලි යන මහත්ම මහත්මීන් ගෙන් සමන්විත ත්‍රිපුද්ගල ශ්‍රේෂ්ඨාධිකරණ විනිසුරු මඩුල්ල ඉදිරියෙහි කැඳවනු ලැබිණි.
එහිදී පෙත්සම්කාර පාර්ශවයේ නීතිඥවරයා අධිකරණයට දන්වා සිටියේ කරුණා අම්මාන් විසින් සිදුකළ බව කියන ප්‍රකාශය සම්බන්ධයෙන් පොලිස්පතිවරයාගේ නියමයෙන් අධිකරණයට කරුණු වාර්තා කර විමර්ශනයක් ආරම්භ කර ඇති බවට දැනුම් දී ඇති බවයි.
මෙම සිද්ධිය සම්බන්ධයෙන් දැනට විමර්ශනයක් ආරම්භ කර ඇති හෙයින් පෙත්සම තවදුරටත් පවත්වාගෙන යාමට අවශ්‍යතාවයක් මතු නොවන අතර එය ඉල්ලා අස්කර ගැනීමට අවසර දෙන ලෙස පෙත්සම්කාර පාර්ශවයේ නීතිඥවරයා අධිකරණයෙන් ඉල්ලා සිටියා.
එම ඉල්ලීම පිළිගත් ශ්‍රේෂ්ඨාධිකරණය පෙත්සම ඉල්ලා අස්කර ගැනීමට අවසර දුන්නා.
ඉකුත් මහ මැතිවරණ සමයේ අම්පාර පැවති දේශපාලන රැස්වීමක දී අදහස් දැක්වූ හිටපු නියෝජ්‍ය අමාත්‍ය විනායගමූර්ති මුරලිදරන් හෙවත් කරුණා අම්මාන් විසින් තමා කොටි සංවිධානයේ සිටියදී එක් රැයක දී හමුදා භටයින් සිය ගණනක් මරා දැමීමට කටයුතු කර ඇති බවට ප්‍රකාශයක් සිදුකළ බවත් එම ප්‍රකාශය සම්බන්ධයෙන් පුළුල් විමර්ශනයක් පවත්වන ලෙස පොලිස්පතිවරයාට නියෝගයක් නිකුත් කරන ලෙස ඉල්ලමින් මෙම පෙත්සම ඉදිරිපත් කර තිබුණා.
