කුෂිනගර් ජාත්‍යන්තර ගුවන්තොටුපොළ විවෘත කෙරෙන අවස්ථාවේදී ප්‍රථම ගුවන් යානය ලෙස මෙරට යූ.එල් 1147 දරන ගුවන් යානය අද අලුයම 05.20ට කටුනායක ගුවන්තොටුපොළෙන් පිටත්ව ගියේය.
මෙම ගුවන් යානයෙන් වස්කඩුව කපිලවස්තු ධාතූන් වහන්සේලා ද ඉන්දියාවට වැඩම කෙරේ. අමාත්‍ය නාමල් රාජපක්ෂ මහතාගේ නායකත්වයෙන් යුත් ශ්‍රී ලංකා දූත කණ්ඩායමට දිවයිනෙහි සෑම ප්‍රදේශයකින්ම භික්ෂූන් වහන්සේලා සියක් නමකට ආසන්න පිරිසක් ද එම අවස්ථාව සහභාගී වෙයි.
ඉන්දියාවේ උත්තර ප්‍රදේශ ප්‍රාන්තයේ පිහිටි ඓතිහාසික කුසිනාරා නගරයේ ඉදිකර ඇති කුෂිනගර් ජාත්‍යන්තර ගුවන්තොටුපොළ මඟින් දඹදිව වන්දනාකිරීම සඳහා පහසුකම් සැලසෙනු ඇති.
බුදුන් වහන්සේ පරිනිර්වාණයට පත් වූ කුසිනාරා නුවරට ඉතා සුවිශේෂී ස්ථානයක් හිමි වෙයි.
2020 සැප්තැම්බර් 26 වැනි දින අග්‍රාමාත්‍ය මහින්ද රාජපක්ෂ මැතිතුමා සමඟ අන්තර්ජාලය ඔස්සේ පැවති ද්විපාර්ශවික සමුළුවේ දී අග්‍රාමාත්‍ය නරේන්ද්‍ර මෝදි මැතිතුමා ප්‍රකාශ කරන ලද්දේ, කුසිනාරා නුවර ගුවන් තොටුපොළට ළඟා වන පළමු ජාත්‍යන්තර ගුවන් යානය ශ්‍රී ලාංකික වන්දනාකරුවන් රැගත් ගුවන් යානයක් වනු ඇති බවයි.
