චීනයේ බීජිං නුවර පැවති 2023 ගෝලීය ඩිජිටල් ආර්ථික සමුළුවේ දී ශ්‍රී ලංකා සමුළු නියෝජිතයින් දක්වන ලද අදහස් සැළකිල්ලට ගෙනයි මෙම අවධානය යොමුව තිබෙන්නේ.
තොරතුරු තාක්ෂණ ක්ෂේත්‍රයේ ශ්‍රී ලංකාව ලබා තිබෙන වර්ධනය ගැන ද චීන නියෝජිතයින් සිය ප්‍රසාදය මෙහිදී පළ කර තිබෙනවා. සිව් දිනක් පුරා පැවති මෙවර සමුළුවේ තේමාව වූයේ “ඩිජිටල්කරණය සංවර්ධනයට මඟපාදයි, බුද්ධිය අනාගතයට මඟ පෙන්වයි” යන්නයි.
ශ්‍රී ලංකාව නියෝජනය කරමින් ශ්‍රී ලංකා තොරතුරු හා සන්නිවේදන තාක්ෂණ නියෝජිතායතනයේ (ICTA) ප්‍රධාන විධායක නිලධාරී මහේෂ් පෙරේරා සහ නියෝජ්‍ය ප්‍රධාන ඩිජිටල් ආර්ථික නිලධාරී සචින්ද්‍ර සමරරත්න යන මහත්වරු මෙම සමුළුවට සහභාගි වුණා.
සමුළුව ඇමතූ මහේෂ් පෙරේරා මහතා 2030 වසර ඉලක්ක කර ගනිමින් ක්‍රියාත්මක කෙරෙන ශ්‍රී ලංකාවේ ඩිජිටල්කරණ ක්‍රමෝපායන් සහ ඩිජිටල් ආර්ථිකය ශක්තිමත් කිරීමට ගෙන තිබෙන පියවර ගැන මෙන්ම එහි ප්‍රගතිය ගැන ද සඳහන් කළා. රටේ ආර්ථික අර්බුදය උග්‍රව පැවති පසුගිය සමයේ ජාතික ඉන්ධන බලපත්‍ර හඳුන්වාදීම මඟින්, පීඩාවට පත් වූ ජනතාවට සහනයක් වු බව පෙන්වා දුන් ඒ මහතා ඩිජිටල් තාක්ෂණයේ ප්‍රතිලාභ ජනතාව ලැබූ එක් අවස්ථාවක් වශයෙන් එය හැඳින්වීය.
ශ්‍රී ලංකාවේ ඩිජිටල් මුල්‍ය ක්ෂේත්‍රය වැඩි දියුණු කිරීම සහ ඩිජිටල් ආර්ථීකය සවිබල ගැන්වීම සඳහා මෙම සමුළුව උත්තේජනයක් වු අතර මෙරට තොරතුරු තාක්ෂණ කර්මාන්තකරුවන් චීන වෙළෙඳපොළට පිවිසීමේ වැදගත්කම මෙහිදී අවධාරණය කෙරුණා.
ලෝකයේ නගර කේන්ද්‍ර කර ගනිමින් ඩිජිටල් ආර්ථිකය ඉහළ නැංවීමත්, නව ව්‍යාපාර හා නවෝත්පාදන ප්‍රවර්ධනය කිරීමත්, 5G තාක්ෂණය වැනි වේගයෙන් සංවර්ධනය වන ඩිජිටල් ක්ෂේත්‍රය වෙත වැඩි අවධානයක් යොමු කිරීමත් මඟින් සාධනීය වෙනස්කම් සඳහා මඟ පෑදෙන බව සමුළු නියෝජිතයන් මෙහිදී පෙන්වා දුන්නා.
මෙරට ඩිජිටල්කරණය වේගවත් කිරීමේ වැඩපිළිවෙළට අදාළව ඔක්තෝබර් මාසයේ දී ශ්‍රී ලංකාවේදී පැවැත්වීමට නියමිත ඩිජිටල් ආයෝජන සමුළුවට සහභාගිවන ලෙස කරන ලද ආරාධනයට ද චීන සමුළු නියෝජිතයින් මෙහිදී යහපත් ප්‍රතිචාර දක්වා තිබෙනවා.
පර්යේෂණ,අධ්‍යාපන,කර්මාන්ත,දේශපාලන ඇතුළු ක්ෂේත්‍රය රැසක් නියෝජනය කරමින් තොරතුරු තාක්ෂණ කර්මාන්තකරුවන්, ආයෝජකයින්, විද්වතුන් ඇතුළු චීනය, ශ්‍රී ලංකාව, හොංකොං,මැලේසියාව,නෝර්වේ,ලාඕසය,සිංගප්පූරුව, එක්සත් අරාබි එමීර් රාජ්‍ය හා ස්ලොවේනියාව ආදී ආරාධිත රටවල් රැසක නියෝජිතයෝ මෙම සමුළුව සඳහා එක්ව සිටියා.
