සම්පත් අබේකෝන් (සභාපති), සම්පත් විජයරත්න සහ චම්පා ජානකී රාජරත්න යන මහත්ම මහත්මීන් ගෙන් සමන්විත ත්‍රිපුද්ගල විනිසුරු මඩුල්ලක් විසින් මෙම නියෝගය කරනු ලැබීය.
එහිදී මෙම නඩුවේ ඉදිරිපත් වූ සාක්ෂිවලින් විත්තිකරුවන්ට එරෙහිව ඉදිරිපත්කර තිබෙන චෝදනා සාධාරණ සැකයකින් තොරව ඔප්පු වී නොමැති හෙයින් විත්තිවාචකය නොකැඳවාම ඔවුන් නිදහස් කරන මෙන් විත්තියේ නීතිඥවරුන් විසින් අපරාධ නඩු විධාන සංග්‍රහයේ 200 වන වගන්තිය යටතේ ඉල්ලීමක් කර තිබුණි.
එම ඉල්ලීමට අදාළ තීන්දුව ප්‍රකාශ කරමින් ත්‍රිපුද්ගල විනිසුරු මඩුල්ලේ සභාපති විනිසුරු සම්පත් අබේකෝන් මහතා ප්‍රකාශ කළේ තුන්වන විත්තිකරු වන නිල් බණ්ඩාර හපුහින්න මහතාට එරෙහිව ප්‍රමාණවත් සාක්ෂි ඉදිරිපත් වී නොමැති හෙයින් ඔහු විත්තිවාචකය නොකැඳවාම නිදොස් කොට නිදහස් කිරීමට පියවර ගන්නා බවයි.
එහෙත් ගාමිණී සෙනරත් ,පියදාස කුඩාබාලගේ සහ ලසන්ත බණ්ඩාර යන විත්තිකරුවන් තුන්දෙනාට එරෙහිව ඉදිරිපත් වී ඇති සාක්ෂි වලට අනුව යම් යම් ස්ථාන පිළිබඳ ව පැහැදිලි කරගැනීම සිදු කිරීමට අවශ්‍යව ඇති නිසා ඔවුන්ගේ විත්තිවාචකය කැඳවීමට අධිකරණය තීරණය කරන බව ද සභාපති විනිසුරුවරයා සඳහන් කළා.
ඒ අනුව එම විත්තිකරුවන්ට සාක්ෂි කූඩුවට නැග සාක්ෂි දීමට හැකියාව පවතින බව සඳහන් කළ සභාපති විනිසුරුවරයා මෙහිදී හරස් ප්‍රශ්න ඇසීමට පැමිණිල්ලේ නීතිඥවරුන්ට අවකාශ සැලසෙන බවද කියා සිටියා.
එසේ නොකරන්නේ නම් විත්තිකූඩුවේ සිට ප්‍රකාශයක් ඉදිරිපත් කිරීමටත් ඔවුන්ට අයිතිවාසිකම් ඇති බව සඳහන් කළ සභාපති විනිසුරුවරයා කිසිදු ප්‍රකාශයක් ඉදිරිපත් නොකොට නිහඬව සිටීමටද හැකියාව පවතින බවයි විවෘත අධිකරණය ප්‍රකාශ කළේ.
ඉන් අනතුරුව නඩුවේ වැඩිදුර විභාගය මැයි මස 6 වනදා දක්වා කල් තැබීමට ද අධිකරණය නියම කළේය.
විත්තිකාර ගාමිණී සෙනරත් මහතා වෙනුවෙන් පෙනී සිටි ජනාධිපති නීතිඥ අලි සබ්රි මහතා ඉල්ලීමක් කරමින් තම සේවාදායකයාට අප්‍රේල් මස 10 වනදා සිට මැයි මස පස්වනදා දක්වා කාලසීමාව තුළ සිංගප්පූරුවේ සහ ඩුබායි දේශයේ සංචාරය කිරීමට අවශ්‍යව ඇති බව දන්වා සිටියේය.
ඒ සඳහා දැනට අධිකරණය මගින් පනවා තිබෙන විදේශ ගමන් තහනම ඉවත් කරන මෙන්ද එම නීතිඥවරයා අධිකරණයෙන් ඉල්ලීමක් කළේය. එම ඉල්ලීම පිළිගත් ත්‍රිපුද්ගල මහාධිකරණ විනිසුරු මඩුල්ල අදාළ කාල සීමාව සඳහා ගාමිණී සෙනරත් මහතා ට පණවා තිබූ විදේශ ගමන් තහනම ඉවත් කිරීමට නියම කළේ.
2014 වසරේ පෙබරවාරි මස පළ වනදා සිට 2015 වසරේ ජනවාරි මස 20 වනදා දක්වා කාලසීමාව තුළ ට්‍රෝ ගෑස් සමාගමට අයත් රුපියල් මිලියන 500ක මුදලක් හෙලන්කො හොටෙල් ඇන්ඩ් ස්පා නමැති සමාගමේ යෙදවීම තුළින් රජයේ මුදල් සාවද්‍ය ලෙස පරිහරණය කළ බවට චෝදනා කරමින් පොදු දේපොළ පනත යටතේ ගාමිණී සෙනරත් මහතා ඇතුළු විත්තිකරුවන් 4 දෙනෙකුට එරෙහිව නීතිපතිවරයා මෙම නඩුව පවරා තිබේ.
