උදේ 10.00ට ඇරඹෙන සංවාදයට දිස්ත්‍රික්කයේ මැති ඇමතිවරු ප්‍රමුඛ මහජන නියෝජිතයෝ, අමාත්‍යාංශ ලේකම්වරු සහ විවිධ ආයතන ප්‍රධානීහූ සහ නිලධාරීහු ජනාධිපතිතුමා සමග එක් වෙති.
ජනාධිපති රාජපක්ෂ මැතිතුමා “ගම සමග පිළිසඳර” වැඩසටහන සැලසුම් කළේ දේශපාලන බලධාරීන් හා නිලධාරීන් කැටුව තමාම ගමට ගොස් ගැමි ජනතාව පෙළන ආර්ථික සමාජ ගැටලු සියැසින් දැක ඒවාට සවන් දී කඩිනම් විසඳුම් දීමෙන් ග්‍රාමීය ජනතාවගේ අභිවෘද්ධිය සැලසීමේ අරමුණ ඇතිවය.
තවමත් රටේ ජනගහණයෙන් 75%ක් පමණ වන ග්‍රාමීය ජනතාව දිගුකලක සිට විවිධ වූ ආර්ථික, සමාජ ගැටලු සමුදායකින් පීඩා විඳිති. ඉඩම් හිඟය, නිරවුල් ඉඩම් ඔප්පු නොතිබීම, පානීය සහ වගා ජල හිඟය, මාර්ග හා ප්‍රවාහන දුෂ්කරතා සෞඛ්‍ය සහ අධ්‍යාපන ප්‍රශ්න, අලි මිනිස් ගැටුම, නිලධාරී තන්ත්‍රයේ උදාසීන බව ඒ අතර ප්‍රමුඛස්ථානය ගනී.
ගැමි ජනයා වෙතින් ගැටලු හඳුනාගෙන ඔවුන්ගේම අදහස් හා යෝජනා පාදක කර ගනිමින් රාජ්‍ය නිලධාරීන්ගේ සහය ඇතිව ඒවා විසඳීම මේ වැඩසටහනේ දී සිදු කෙරේ. විසඳීමට කල්ගතවන ගැටලු පසුව ආමන්ත්‍රණය කරනු පිණිස සටහන් කර ගනු ලැබේ.
ගැමි ජනතාව පීඩාවට පත් කරන ප්‍රශ්න එක් පාර්ශ්වයක කෝණයෙන් පමණක් බලා තේරුම් කිරීම විසඳුම් පමාවට හේතුවක් බව ජනාධිපතිතුමා අදහස් කරයි. නිලධාරීහූ එක් ආකාරයකටත්, ගැමියා තවත් ආකාරයකටත් ප්‍රශ්නය දකිති.
ප්‍රශ්නයේ සියලු පැති නිවැරදිව හඳුනා ගැනීමෙන් විසඳුම් දීම පහසු බවත්, කඩිනම් කළ හැකි බවත් ජනාධිපතිතුමා පෙන්වා දෙයි. මෙතෙක් පැවති “ගම සමග පිළිසඳර” වැඩසටහන්වලදී මේ මාදිලිය උපයෝගී කර ගනිමින් ප්‍රශ්න ගණනාවකට එසැණ සහ පසුකාලීන විසඳුම් දීමට හැකි විය.
2020 සැප්තැම්බර් 25 වැනි දින බදුල්ල දිස්ත්‍රික්කයෙන් “ගම සමග පිළිසඳර” වැඩසටහන ආරම්භ විය. මාතලේ, රත්නපුරය, අනුරාධපුරය, අම්පාර, පොළොන්නරුව, කලුතර, මොණරාගල, කෑගල්ල, මහනුවර, පුත්තලම, ත්‍රිකුණාමලය, කුරුණෑගල සහ ගාල්ල දිස්ත්‍රික්ක ආවරණය වන පරිදි පසුගිය වැඩසටහන් සංවිධාන කෙරිණ.
හෙට “ගම සමග පිළිසදර” සඳහා තෝරාගෙන ඇති යොඹුවැල්තැන්න ග්‍රාම නිලධාරී වසම වලපනේ නගරයේ සිට කි.මි 13ක් දුරින් පිහිටා තිබේ. එය වලපනේ ප්‍රාදේශීය ලේකම් කොට්ඨාසයට අයත් ග්‍රාම නිලධාරී වසම් අතරින් වඩාත්ම දුෂ්කර ගම්මානය වේ.
ඌව වෙල්ලස්ස සටනට දායකත්වය දුන් ජනතාවක් ජීවත් වූ පෞරාණික ප්‍රදේශයක් වන යොඹුවැල්තැන්න කැප්පෙටිපොළ නිළමේතුමා යළි සිංහල හමුදාව සමග එක්වූ ප්‍රදේශය බව ජනප්‍රවාදයේ සඳහන්ය.
ඖෂධීය ශාඛයක් වන යෝඹුවැල් බහුල නිසා ගමෙහි නම නිර්මාණය වූ බව කියවේ. පවුල් 139ක් වෙසෙන යෝඹුවැල්තැන්න ග්‍රාමයේ දැන් ජනගහණය 397කි. වී සහ එළවළු වගාව ජනතාවගේ ප්‍රධාන ජීවනෝපාය වේ.
යෝඹුවැල්තැන්න හා ඒවට ගම්මානවල ජනතාව පොදු ප්‍රශ්න රැසකින් පීඩා විඳිති. මාර්ග හා ප්‍රවාහන දුෂ්කරතා, පාසල්වල යටිතල පහසුකම් ප්‍රමාණවත් නොවීම, සෞඛ්‍ය සහ සනීපාරක්ෂක පහසුකම් ඌනතා, පානීය ජල හිඟය ඒ අතර වේ. වගාව සඳහා ජලය නැතිවීමෙන් කෘෂිකර්මික ගැටලු රැසකට ද ඕව්හු මුහුණ දී සිටිති. විධිමත් වෘත්තීය පුහුණුවක් හා ස්වයං රැකියා සඳහා අත්වැලක් නොලැබීම ඇතුළු ගැටලුවලට ප්‍රදේශයේ තරුණ තරුණියෝ මුහුණ දී සිටිති.
